Жирэмсний үеэр алим, загас их идвэл төрөх хүүхдэд харшил, багтраа тусах эрсдэл багасдаг гэж Швейцарь, Данийн эрдэмтэд баталжээ. Судлаачид 1200 хүүхдийг эхийн хэвлийд байхаас нь таван нас хүртэл нь ажиглалт хийсэн байна. Мөн ирээдүйн эхээс 32 долоо хоногтой жирэмсэн байх үед нь ямар бүтээгдэхүүн голчлон хэрэглэж байсан талаар санал асуулга явуулжээ.
Ажиглалт хийсэн хүүхдүүдийг таван нас хүртэл ээжүүд нь харшилтай боллоо, амьсгал нь давхцаад байна гэж эмнэлэгт хандсаар байжээ. Ингээд эмч нар хүүхдүүдийн цусанд шинжилгээ хийж, уушгийг нь үзсэний эцэст ээжийг нь жирэмсэн байх үедээ юу иддэг байсныг нь эргүүлэн харжээ. Гэтэл алим, загас их хэрэглэдэг байсан ээжийн хүүхдүүд харшил, багтраа, экзем тусах нь харьцангуй бага байсан гэнэ.